• Lao (ພາສາລາວ)
Home ຂ່າວຕ່າງໆ ຂ່າວ ສຶກສາ ແລະ ກິລາ ພິທີ ມອບ-ຮັບ ໂຄງການກໍ່ສ້າງ ໂຮງຮຽນ ອະນຸບານ - ປະຖົມ ບ້ານກາງ ເມືອງຊຳເໜືອ ແຂວງຫົວພັນ ຫຼັງໃໝ່ ຢ່າງເປັນທາງການ

ພິທີ ມອບ-ຮັບ ໂຄງການກໍ່ສ້າງ ໂຮງຮຽນ ອະນຸບານ - ປະຖົມ ບ້ານກາງ ເມືອງຊຳເໜືອ ແຂວງຫົວພັນ ຫຼັງໃໝ່ ຢ່າງເປັນທາງການ

ພິທີ ມອບ-ຮັບ ໂຮງຮຽນ ອະນຸບານ - ປະຖົມ ບ້ານກາງ ເມືອງຊຳເໜືອ ແຂວງຫົວພັນ ຢ່າງເປັນທາງການ ໄດ້ຈັດຂຶ້ນໃນຕອນເຊົ້າວັນທີ 11 ພຶດສະພາ 2017 ນີ້ຢູ່ທີ່ເດີ່ນ ໂຮງຮຽນດັ່ງກ່າວ ໂດຍເປັນກຽດການເຂົ້າຮ່ວມຂອງ ພະນະ ທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ,

ຮອງປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ມີ ທ່ານ ວັນໄຊ ແພງຊຸມມາ ກໍາມະການສູນກາງພັກ ເລຂາພັກແຂວງ ເຈົ້າແຂວງຫົວພັນ, ມີບັນດາທ່ານຫົວໜ້າພະແນກການອ້ອມຂ້າງແຂວງ, ອ້ອມຂ້າງເມືອງ, ການນຳແຂວງ, ການນຳເມືອງ, ຜູ້ອຳນວຍການບໍລິສັດທັງພາຍໃນ, ພາຍນອກ, ຄະນະຮັບຜິດຊອບໂຄງການ, ອຳນາດການປົກຄອງບ້ານກາງ, ພະນັກງານຄູ-ອາຈານ ແລະ ນ້ອງຫຼານນັກຮຽນ ຕະຫຼອດຮອດ ພໍ່-ແມ່ ປະຊາຊົນບັນດາເຜົ່າ ເຂົ້າຮ່ວມເປັນພະຍານຢ່າງຫຼວງຫຼາຍ
ໃນພິທີ ທ່ານ ມົນທອງ ລຽນຕິຄຸນ ຫົວໜ້າພະແນກສຶກສາທິການ ແລະ ກິລາແຂວງ ໄດ້ຂຶ້ນຜ່ານບົດລາຍງານການຈັດຕັ້ງປະຕິບັດໂຄງການກໍ່ສ້າງ ໂຮງຮຽນ ອະນຸບານ - ປະຖົມ ບ້ານກາງ ເມືອງຊຳເໜືອ ໂດຍຫຍໍ້ ຕໍ່ພິທີໃຫ້ຮູ້ວ່າ: ໂຄງການກໍ່ສ້າງໂຮງຮຽນ ໂຮງຮຽນ ອະນຸບານ - ປະຖົມ ບ້ານກາງ ແຫ່ງນີ້ແມ່ນໄດ້ເລີ່ມຕົ້ນລົງມືກໍ່ສ້າງນັບແຕ່ທ້າຍ ເດືອນທັນວາ 2016 ເປັນຕົ້ນມາ ໂດຍແມ່ນ ບໍລິສັດ ໄຊປັນຍາ ກໍ່ສ້າງ ເປັນຜູ້ຮັບເໝົາກໍ່ສ້າງ ເຊິ່ງລວມມູນຄ່າການກໍ່ສ້າງທັງໝົດ 1 ຕື້ 500 ກ່ວາກີບ ເຊິ່ງປະກອບມີ: ອາຄານຮຽນຊັ້ນ ອະນຸບານ ຈຳນວນ 1 ຫຼັງ, ປະກອບມີ: 3 ຫ້ອງຮຽນ, 1 ຫ້ອງການຄູ ມີຂະໜາດ 24 x 8 ແມັດ, ຝາກໍ່ດ້ວຍດິນຈີ່, ພື້ນເບຕົງເສີມເຫຼັກພ້ອມທັງຄັດມັນ, ຫຼັງຄາມຸງດ້ວຍສັງກະສີອາລູຊິ້ງ, ໃນຫ້ອງຮຽນແຕ່ລະຫ້ອງແມ່ນມີລະບົບໄຟຟ້າຄົບຊຸດ, ອາຄານຮຽນຊັ້ນ ປະຖົມ ຈຳນວນ 1 ຫຼັງ, ມີຂະໜາດ 24 x 8 ແມັດ, ຝາກໍ່ດ້ວຍດິນຈີ່, ພື້ນເບຕົງເສີມເຫຼັກພ້ອມທັງຄັດມັນ, ຫຼັງຄາມຸງດ້ວຍສັງກະສີອາລູຊິ້ງ, ໃນຫ້ອງຮຽນແຕ່ລະຫ້ອງແມ່ນມີລະບົບໄຟຟ້າຄົບຊຸດ,ເຊິ່ງປະກອບມີ: 4 ຫ້ອງຮຽນ, 1 ຫ້ອງສາງມ້ຽນເຄື່ອງ, ຫ້ອງນ້ຳ 2 ຫຼັງໆລະ 2 ຫ້ອງ ເຊິ່ງກໍ່ສ້າງສຳເລັດໄປແລ້ວ 58% ( ເປີເຊັນ ) ໃນນັ້ນຍັງມີໜ້າວຽກຈຳນວນໜຶ່ງທີ່ຍັງບໍ່ທັນສຳເລັດສົມບູນເທື່ອ ແລະ ທາງຜູ້ຮັບເໝົາຈະຍັງໄດ້ສືບຕໍ່ກໍ່ສ້າງໃຫ້ສຳເລັດກ່ອນ ເປີດສົກຮຽນໃໝ່ ວັນທີ 1 ກັນຍາ 2018 ທີ່ຈະມາເຖິງນີ້, ວຽກທີ່ຍັງຄ້າງປະກອບມີ: ກໍ່ສ້າງອາຄານຮຽນຊັ້ນ ປະຖົມ ຈຳນວນ 1 ຫຼັງ, ມີ 2 ຫ້ອງຮຽນ, 1 ຫ້ອງການຄູ, 1 ຫ້ອງອ່ານ, ເຊິ່ງມີຂະໜາດ 24 x 8 ແມັດ, ວຽກປັນດິນພາຍໃນເດີ່ນຕໍ່ໜ້າໂຮງຮຽນ, ກໍ່ສ້າງຮົ້ວອ້ອມໂຮງຮຽນ ແລະ ປ້າຍຊື່ໂຮງຮຽນ ຄິດເປັນເປີເຊັນ ວຽກຍັງຄ້າງແມ່ນເທົ່າກັບ 42% ( ເປີເຊັນ ) ຖືວ່າວຽກທີ່ສຳເລັດຕົວຈິງແມ່ນເຮັດສຳເລັດແລ້ວ 58% ( ເປີເຊັນ ) ລວມເວລາການກໍ່ສ້າງຜ່ານມາທັງໝົດປະມານ 5 ເດືອນປາຍ ຫຼື ປະມານ 150 ກ່ວາວັນໂອກາດດັ່ງກ່າວ ທ່ານ ນິນ ປັນຍາ ຜູ້ອຳນວຍການບໍລິສັດ ໄຊປັນຍາ ກໍ່ສ້າງ ໃນນາມຜູ້ຮັບເໝົາກໍ່ ສ້າງ ແລະ ທ່ານ ມັນທອງ ລຽນຕິຄຸນ ຫົວໜ້າພະແນກສຶກສາທິການ ແລະ ກິລາແຂວງ ກໍ່ໄດ້ພ້ອມກັນຂຶ້ນເຊັນສັນຍາ ມອບ-ຮັບ ໂຄງການກໍ່ສ້າງ ໂຮງຮຽນ ອະນຸບານ - ປະຖົມ ບ້ານກາງ ເມືອງຊຳເໜືອ ແຂວງຫົວພັນ ຢ່າງເປັນທາງການ, ໂອກາດດຽວກັນຍັງມີບັນດາບໍລິສັດ ທີ່ມາຮ່ວມພິທີກໍ່ໄດ້ມອບເງິນເພື່ອປະກອບເຂົ້າໃນການກໍ່ສ້າງໂຮງຮຽນດັ່ງກ່າວຕື່ມອີກເຊິ່ງປະກອບມີດັ່ງນີ້: ບໍ ລິສັດແສງທອງ ກໍ່ສ້າງ ມອບເງິນສົດ 50 ລ້ານກີບ, ບໍລິສັດຂົນສົ່ງ-ໂດຍສານ ວຽງຈັນ ມອບເງິນສົດ 30 ລ້ານກີບ ແລະ ບໍລິສັດ ພອນຈະ ເລີນ ກໍ່ສ້າງ ມອບເງິນສົດ 10 ລ້ານກີບ ໃຫ້ກຽດຮັບໂດຍ ພະນະ ທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ທີ່ມາຂອງ ແຫຼ່ງທຶນ ແລະ ງົບປະມານຕ່າງໆ ທີ່ປະກອບເຂົ້າໃນ ໂຄງການກໍ່ສ້າງໂຮງຮຽນ ອະນຸບານ - ປະຖົມ ບ້ານກາງ ແຫ່ງນີ້ແມ່ນໄດ້ມາຈາກການລະດົມທຶນຂອງ ພະນະ ທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ເປັນຜູ້ປຸກລະດົມຊອກຫາ, ໂອກາດດຽວກັນ ທ່ານຍັງໄດ້ມີຄຳເຫັນ ແລະ ໃຫ້ທິດເຢືອງທາງຕໍ່ພິທີເປັນຕົ້ນເພິ່ນຍັງໄດ້ເນັ້ນໃຫ້ການນຳພະແນກສຶກສາທິການ ແລະ ກິລາແຂວງ, ຫ້ອງການສຶກສາທິການ ແລະ ກິລາເມືອງຊຳເໜືອ, ຄະນຳອຳນວຍການໂຮງຮຽນ ຕະຫຼອດຮອດອຳນາດການປົກຄອງຂອງບ້ານກາງ ໃຫ້ມີຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນ, ພ້ອມກັນເອົາໃຈໃສ່ປົກປັກຮັກສາ ແລະ ພັດທະນາໂຮງຮຽນແຫ່ງນີ້ໃຫ້ກາຍເປັນບ່ອນກໍ່ສ້າງຊັບພະຍາກອນມະນຸດນັບມື້ນັບດີຂຶ້ນເລື້ອຍໆ, ພ້ອມກັນສືບຕໍ່ສົ່ງເສີມລູກຫຼານຂອງຕົນໃຫ້ກາຍເປັນຄົນຮູ້ຜູ້ດີຂອງພໍ່-ແມ່, ຂອງສັງຄົມ, ເປັນນັກຮຽນດີ, ຮຽນເກັ່ງ ກຽມພ້ອມໃຊ້ປະເທດຊາດ ໃນອານາຄົດ, ທັງນີ້ກໍ່ເພື່ອເປັນການຫວນຄືນບ້ານເກີດເມືອງນອນຂອງຕົນເອງທີ່ໄດ້ຈາກໄປເປັນເວລາ 58 ປີ ທີ່ຖືກໄປຮັບໜ້າທີ່ຕາມການມອບໝາຍຂອງ ພັກ-ລັດ ຢູ່ນະຄອນຫຼວງວຽງຈັນ, ອີກອັນໜຶ່ງກໍ່ເພື່ອມອບເປັນຂອງຂັວນໃຫ້ປະຊາຊົນຊາວ ແຂວງຫົວພັນ ໂດຍສະເພາະແມ່ນ ພໍ່-ແມ່ ພີ້ນ້ອງ ຕະຫຼອດຮອດອຳນາດການປົກຄອງເຂດບ້ານກາງ ໄດ້ມີໂຮງຮຽນຫຼັງງາມໆ ໃຫ້ລູກຫຼານໄດ້ມີຄວາມສະດວກໃນການຶກຜົນຫຼໍ່ຫຼອມ ແລະ ສຶກສາຮໍ່າຮຽນ, ອີກອັນໜຶ່ງກໍ່ເພື່ອເປັນການປົວແປງ ແລະ ພັດທະນາໂຮງຮຽນຫຼັງທຳອິດທີ່ ທ່ານຮອງປະທານປະເທດ ແຫ່ງ ສປປ ລາວ ຄົນປະຈຸບັນໄດ້ເຄີຍເຂົ້າຮຽນຢູ່ໂຮງຮຽນແຫ່ງນີ້ີ, ທ້າຍພິທີ ທ່ານ ຮອງປະທານປະເທດ ຍັງໄດ້ມອບອຸປະກອນການສຶກຈຳນວນໜຶ່ງໃຫ້ແກ່ໂຮງຮຽນ ແລະ ຮ່ວມປູກຕົ້ນໄມ້ເພື່ອເປັນທີ່ລະນຶກຕື່ມອື່ມອີກ

ຜູ້ທີ່ເຂົ້າຊົມ

ເຮົາມີ 19 ບຸກຄົນທົ່ວໄປ ອອນໄລນ

ສະຖິຕິເຂົ້າຊົມ

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterມື້ນີ້112
mod_vvisit_counterມື້ວານ158
mod_vvisit_counterອາທິດນີ້270
mod_vvisit_counterອາທິດກ່ອນ2106
mod_vvisit_counterເດືອນນີ້3728
mod_vvisit_counterເດືອນກ່ອນ5619
mod_vvisit_counterທັງໝົດ148116