|
ທ່ານ ນາງ ແສງເດືອນ ລົງຢ້ຽມຢາມ ແລະ ກວດກາ ບ້ານຊ່ວຍເຫຼືອເດັກ SOS. | ໃນລະຫວ່າງວັນທີ 01 ເຖິງ 03/7/2010 ຜ່ານມານີ້, ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີຊ່ວຍ ວ່າການກະຊວງສຶກສາທິການ, ຮອງປະທານຄະນະກຳມາທິການ SOS ຂັ້ນສູນກາງ ໄດ້ລົງຢ້ຽມຢາມ ແລະ ກວດກາ ຢູ່ບ້ານຊ່ວຍເຫຼືອເດັກ SOS ທີ່ແຂວງສະຫວັນນະເຂດ ແລະ ຈຳປາສັກ ໄປຮອດແຕ່ລະແຫ່ງ ທ່ານລັດຖະມົນຕີຊ່ວຍ ກໍ່ໄດ້ຮັບຟັງການລາຍງານສະພາບການຈັດຕັ້ງປະຕິບັດ ບັນດາກິດຈະກຳ ຂອງບ້ານຊ່ວຍເຫຼືອເດັກ SOS ທັງດ້ານດີ ແລະ ຄົງຄ້າງ. |
ບ້ານຊ່ວຍເຫຼືອເດັກ SOS ທີ່ສະຫວັນນະເຂດໄດ້ຮັບການສ້າງຕັ້ງຂື້ນໃນປີ 2007 , ໃນເນື້ອ ທີ່ທັງໝົດ 27.000 ຕາແມັດ, ບ້ານຊ່ວຍເຫຼືອເດັກນີ້ມີ 15 ຄອບຄົວ, 2 ຄອບຄົວ ແມ່ນຮັບຮອງເອົາເດັກທີ່ຂາດສານອາຫານ, ປັດຈຸບັນ ບ້ານພັກເດັກມີ 104 ຄົນ, ຍິງ 46 ຄົນ. ບ້ານຊ່ວຍເຫຼືອເດັກ SOS ປາກເຊໄດ້ຮັບການສ້າງຕັ້ງຂື້ນໃນທ້າຍປີ 1996, ມີແມ່ລ້ຽງ ແລະ ພະນັກງານຮັບໃຊ້ 36 ຄົນ, ຍິງ 28 ຄົນ, ມີເດັກ ກຳພ້າ, ກຳພອຍ ອາຍຸ ແຕ່ 4 ປີ ເຖິງ 22 ປີ ລວມມີ 208 ຄົນ, ຍິງ 82 ຄົນ. ບ້ານຊ່ວຍເຫຼືອເດັກ SOS ແຫ່ງ ສ ປ ປ ລາວ ແມ່ນຮັບເອົາເດັກນ້ອຍກຳພ້າກຳພອຍ ພ້ອມຜູ້ດ້ອຍໂອກາດໃນສັງຄົມເຂົ້າມາລ້ຽງດູ ດຳເນີນງານຕາມ ຫຼັກ 4 ປະການຂອງກົດໝາຍ ສ ປ ປ ລາວ ແລະ ສາກົນຄື: ຫຼັກການທີ 1: ແມ່, ຫຼັກການທີ2: ອ້າຍເອື້ອຍນ້ອງ, ຫຼັກການທີ 3: ຄອບຄົວ ແລະ ຫຼັກການທີ 4 ໝູ່ບ້ານ. ກິດຈະກຳຕົ້ນຕໍຂອງໂຄງການແມ່ນປຸກສ້າງທີ່ຢູ່ອາໃສ, ສິ່ງອຳນວຍຄວາມສະດວກຕ່າງໆ, ປະກອບ ແມ່ ແລະ ນ້າສາວ ເພື່ອໃຫ້ການລ້ຽງດູເບິ່ງແຍງເດັກ, ປຸກສ້າງໂຮງຮຽນອະນຸບານຕິດພັນກັບບ້ານຊ່ວຍເຫຼືອເດັກ SOS ແລະ ໂຮງຮຽນ ປະຖົມ, ມັດທະຍົມ ເພື່ອເປັນບ່ອນສຶກສາຮ່ຳຮຽນຂອງເດັກ SOS ແລະ ເດັກນອ້ຍລູກຫຼານປະຊາຊົນບ້ານອ້ອມຂ້າງ. ວັນທີ 08/07/2010. ສີທົງ ພົງວິຈິດ ລາຍງານຂ່າວ |
